jueves, 23 de julio de 2009

Ayer estié en La Estiva

con un amigo fotografo -d'es buens, no pas como yo- e me podié aprofitar d'es suyos trastes, cosa que no podebe fer cuan tenebe la Olympus, una de las avantallas de gastar Canon. Pues como decibe, me deixó trastiar con el 100 macro e con el 100-400. La pena estió la luz, que no acompanyaba mica perque yera muto mala. Pero con tot e con ixo no se puede deixar pasar ixas oportunidatz d'emplegar buens cristals. Tos deixo tres fotos de las que i ficié.
Esta ye una siempreviva (Sempervivum montanum), la foto la fayé con el 100 macro e habié a meter-le una apertura pro grand (f/2'8) perque feba muto aire, e se zarraba el diafragma saliba movita:
E estas dos son d'uns chizardz (n'i heba una trentena a'l menos) que viyemos baixando cara Lalarri. La primer foto ye trepidata, pero la he guardata perque me fa goyo la sensación de movimiento que tiene, cuan sepia fer bien es barritos (¿escobazos? ¿escopallazos? ;)) ya la esborraré:
E esta altra nos amuestra un chizard en el suyo medio estival, encara que pareixca Mordor ye la valle de Pineta:

jueves, 16 de julio de 2009

Tubos d'extensión

M'he feto con uns tubos d'extensión de canon pa fer macro. No ye que sían una tecnolochía enorme, pos son tres cerclos de plastico con la rosca pa poder chuntar el cuerpo de la camara con el obchetivo. Como el mío obchetivo macro no ye mica buen, se el fuerzo dica es 300 mm se i veyen aberracions en es bordes, ya arribará el 100 macro de canon. Mientres i arriba e no (pa días i hai caldo), me'l voi pasando pro bien con estes tubos. Principalment sirven pa poder aproximar més la lente. Se la distancia minima d'enfoque d'el mío macro son 75 cm., con estes tubos me i puedo acercar una minquirrina més, per el que el que quiero afotar sale més grand que se no emplegás estes tubos. Tos ne deixo bel·la muestra:
Un cuco royo (es míos conoiximientos d'entomolochía -u el que sía- son nulos):
El centro d'una flor de carronera (Rosa canina, més conoixita en aragonés como gabardera u bel·la variant)

Una floreta muit chiquirrina:E una palometa, tampoco no sé el suyo nombre:

lunes, 13 de julio de 2009

Capellanetz (Pyrrhula pyrrhula)

No he sentito nuca el nombre en aragonés pa esta especie de paixarico (en castellano ye camachuelo, e en catalán pinsà borroner), encara que Vidaller (en el suyo Libro de As matas y os animals) diz que talment en Bielsa se le diga capellanet. Yo a'l menos nunca el he sentito, que no quiere decir ni muto menos que no exista, habrí a preguntar-lo; pero cuento que ixe nombre le vendrá per la color del peto d'el masto.
Fa pocos días viyé que una parella yera ateclando el niedo en una mata de buixo, deixé el auto cerqueta (yeran fetos a veyer ixe auto a'l canto), amané la camara e las valors oportunas (mismo el flash, perque encara no heba salito el sol) e disparé cuantas fotos. Con tot e con ixo m'he visto obligato a fer cualque recorte, perque el 300 mm. (420 en reyalidat) no da pa tanto, e menos éste que no ye guaire buen,perque no me i querié apretar guaire. Con tot e con ixo m'he feto contento de las primers prebas que he feto dende el "auto-esconderite" (u "coche-hide" que diría bel·laún).
Seguntes la mía guía de paixaricos (la de Omega): "las parellas de capellanetz a menuto ya se fan d'agüerro. D'hibierno van chuntos per tot arreu e a partir de marzo miran un lugar pa fer el niedo. S'alimentan de materia vechetal e s'estiman més chitos de cirgüellos e acirons, asinas como per semillas d'ixordicas e d'acirons. Manimenos, las aus chóbens se crían con cucos".
El masto:

E la fembra, con rametas pa'l niedo:

jueves, 9 de julio de 2009

Imos a redir-nos-ne

Abe tiempo que no i pincho garra video, hue en traigo un d'un humorista inglés -Sacha Baron Cohen- que descubrié fa poco gracias a la pelicula Borat, que me fayó esmelicar-me como no me pasaba con una peli dende que viyé "La vida de Brian". Casualment las dos son d'humoristas ingleses. Bien, mirando per youtube se i heba més videos de Borat, descubrié a Ali G, reportero-camello que fa unas entrevistas buenismas, a'l menos pa'l mío gusto. N'he visto bel·launa que la doblan es de Gomaespuma, pero no me fan mica goyo; m'estimo més de veyer-lo en la versión orichinal con subtítols. Tos ne deixo un par de videos aquí (de Borat) e astí (d'Ali G). Que tos divertiatz.

lunes, 6 de julio de 2009

Pareixco fato

u talment en sía.No tos pensetz que tiengo mica ganas de continar escribindo (bueno, escribir tampoco no ye que escriba guaire), pero voi fendo fotos e me fa goyo de dar-les salita e que las veiga la chent (tampoco no sé se i hai guaire chent que siga el mío pasatiempo). Pos ixo, qu evoi a fer caso a Lois Chabier, a'l menos per bel tiempo.
Las tipicas, e curtas, explicacions. Llevamos 15 días que totas las tardes plebe, muto u poco pero va pasando tronacils; e ixo, ademés d'el feto de no poder aprofitar totz es ratos pa ir fendo fotos, aporta una luz que a yo me fa muto goyo, asinas como ixas gotetas d'augua que aportan més, a'l menos pa'l mío gusto.
Un martagón, encara no son totz ubiertos, per ixo encara i habrá tiempo de conseguir bel·la foto decent:
Un cuco que ye la segunda vez que el veigo. se de flors en tiengo poca ideya, de cucos menos (menos ixe refrán que diz: Pa que se'l minchen es cucos que se'l minchen las cucas). Es dos días que es he vistos heba plevito he pareixeban como aletargatos.
Una malveta (malva malveta, cura-me la ixordiqueta, que diz la cultura popular. Talment sía un placebo, pero funciona).

En un lirio blanco (¿será albino?). No n'i hai guaires, pero este sale totz es anyos en el mismo puesto.